[愛歌] 夢中做戇儂-AMIT

夢中做戇儂

詞：陳佳惠
曲：黑色牡羊

滿天个田蠳，飛過夢中田岸墘。夢彼段，初戀滋味。
牛郎佮織女每一年，相逢也有時。汝佮我注定分離。
青色海岸，白色个沙，兩雙跤印無聲恬恬行相偎。

風咧唱歌，雲來做伴，汝我哪會無牽手个勇氣？

想汝彼一暗，相思茫茫寂寞氣味重，故鄉月照袂著希望啊。
孤單一个儂，雨水冷冷花蕊失清香，想欲來挽回，已經慢。

想汝彼一暗，夢來成空目箍已經紅，阮猶是無法度袂記啦。
賰我一个儂，彼條情歌阮猶唱袂煞，天頂星也笑阮是戇儂。


少年家青春來討債，喙鬚嘛已經白，無注意緣份就錯過。
敢講汝毋知，一世人無兩回，重來个機會。

月娘啊陪伴阮 ～ 做眠夢 ～ 

愛是汝，愛是死-TTS

"因為愛汝，所以欲佮汝做伙死。"


看著有儂講伊欲佮LADY GAGA做伙死个新聞了，我誠會使體會這種感覺。
因為愛袂著，而且覺悟著這世人無可能做伙，得袂著汝个心，得著汝个儂也好。
我感覺這種愛情，是上媠，但也是上絕望个愛。


無知影按怎，大部分个愛情故事攏足愛這種愛情。
敢講儂个天性就是愛袂著个上好?


可能也只有死過个儂才會使回答。


但是，
誰會當回答?

若袂記得開始，就毋知當時結束-TTS

彼个時陣，
愛傷緊，像番仔火，
著火矣就無人通阻擋。


也就按呢，咱佇啥攏毋知各時陣，
就行到雙叉路。
講好莫越頭，
另工會閣相拄。


汝健康，我平安，
只是目箍已經予火
薰紅。

[金馬] Kawasakiho růže(水墨玫瑰)

http://www.youtube.com/watch?v=0U-pST0ZjhE

Kawasakiho růže翻過來就是"川崎个

玫瑰"。川崎也就是電影內底个一个

日本人，一个心碎个日本畫家。這

齣電影就是咧講佇伊心碎停畫了，

拄著主角怹*，因為怹个經歷，予

伊閣重新作畫个故事。

雖然伊毋是主角，而且嘛無講著啥話XD

但是無要緊，我想導演一定是有伊个安排才會挈來號

名。誰規定講故事一定愛對主角開始講?我就是愛拍破

規矩，予配角做一个仔主角~

這齣電影比看《袂著个目睭》緊張刺激，音樂也較濟

種。(但是ARGENTINA个國歌才是我个第一名~XD)

我家己咧看電影，總是會特別去看一寡佮威權時代、

轉型正義有關係个題材。所以，嘛無知影是毋是時間

問題，這改金馬選个拄仔好兩齣攏有。雖然按呢，我也是莫挈來比較才好，按怎講兩齣電影時空背景个設定

差真多，無適合。

有儂講這齣電影是愛逐家"大和解"，趕是按呢?

我家己看著个毋是按呢。電影最後一幕，是彼个警賊

仔頭佇遐歡歡喜喜過生日。敢講是欲大和解个意思?

抑是欲暗示政府佇轉型正義無做了完全?

聽我朋友講，轉型正義有三種:

1.公佈真相，處罰。

2.公佈真相，無處罰。

3.無公布真相，也無處罰。

雖然，我家己認為第三種根本就無算。但是，真悲哀个，台灣就是佇第三種。根據伊个講法，按呢會造成族群對立、衝突。敢講維持這種表面个假和平就有較好?

自我認同是"中國儂"个攏真愛這味乎*?

我咧臆Česká 是第二種，所以導演才會拍這齣戲，來提醒Česká个儂，愛勇敢面對真相，去處理伊。

唉...拍拍咧心情誠歹，連呆呆法律个攏會講出莫轉型正義較好這種話，真正是心寒。

講轉來，音樂足好聽，想欲找原聲帶來聽，無知佗位有?

*怹(in)，教育部公佈个是(亻因)，但是拍袂出來，只好按呢代替。

*乎(honn)

[金馬] 看袂著个目睭

看袂著个目睭（La Mirada Ivisible）
http://www.youtube.com/watch?v=q3zMDrwHFAY


  其實會選這部片是因為我個人對Argentina有特別个偏愛。毋知影按怎，我就是感覺伊佮台灣誠成*，攏有一段足長个戒嚴期，一直到最近才恢復正常个民主。
而且，雖然恢復民主，但是因為一寡反民主个力量，像"轉型正義"無實施了足完全，所以，予政治一直嘛是閣足亂。
毋過，人嘛是誠打拚咧拍一寡彼个時期个電影，像台灣，蓋成較少...
但是，最近像《眼淚》就袂bai2(禾黑)!好電影一齣!!
台灣儂meh..總是較愛漏氣求進步啦~XD




轉來講電影內容...
這部是誠悶，毋過是袂睏去个彼種啦 ! (抑是我有訓練過XD，雖然按呢有个片我嘛是睏去)
而且，我感覺這部片想欲表達个就是"悶"。彼个戒嚴時代，人民當然是"悶"。
有活過个儂就知，毋管佇佗位，攏要求"規矩"。因為，有規矩才好管理，獨裁者上愛个就是這款"乖囡仔"。
所以，這部片應該會使講是"重現"彼个時陣个學校生活。像，愛排隊去上課、上課前愛對教師"行禮"、隨時保持服裝儀容...遮會予學生失去學習興趣个"規矩"。(是講，獨裁政府也無需要提高學生个學習興趣啦)




就因為按呢，我誠歡喜活佇解嚴了个台灣，有興趣看別國戒嚴時期个學校生活會使去看~
嘛會使比較看覓*兩國个學生回憶是毋是差不多。




夠忝个...後改才來拍《水墨玫瑰》  XD




*誠成:tsiann5 sing5
 看覓:khuann3 mai7

[電影] Tutti Giu Per Terra(台譯:華特的非常生活)

    若按照italiano个意思翻過來，應該是叫做《倒轉來地球（土地）》，這个譯名嘛較合電影个內容。實在是毋知影為啥物台灣个華語譯名攏欲翻甲花嗄嗄，予儂看袂出電影个內容想欲講啥，想欲展伊个華語文嘛毋免按呢害電影。就是因為按呢咧創電影，才害一寡好電影因為譯名毋偌濟儂看過。

    話講轉來，會因為譯名足奇怪就無欲看个儂，家己嘛是傷膚淺。這種儂咧看電影只是搵豆油爾，干焦會揀片名看起來較"高級"个片來看。

    這部電影是1997發行个，所以畫質無誠好。毋過，題材誠趣味，有儂講伊是italia个《Trainspotting》（猜火車）。我家己看嘛是有這種感覺，只是這部片較重少年儂个煩惱，《Trainspotting》予我个感覺是反毒。XD

    啥物攏無想欲做个少年儂，絕對袂少。只是逐家攏漸漸接受命運，變成社會上个小螺絲。了後，等in家己變較重要个螺絲，就換in來共新一代各少年嚇、壓。

這个社會哪會遮悲哀，敢攏袂使合作?抑是儂老矣攏會較保守?






ps.花嗄嗄(hue sa sa)
     創(tshong3):舞、做
     干焦(kan-na)
     in:伊个複數

[電影] IRINA PALM (台譯:洞裡春光)

這片DVD是進前佇光南買个，毋過，一直攏無時間看。袂記得是頂禮拜六抑是禮拜，才想著我有這片。所以就利用拄仔開學緊看看咧!抑無感仔我這學期會誠無閒...


好...話講轉來，我會買這塊个原因就是想欲知影性工作者个生活是按怎。
雖然，我感覺這片一定無像真正个紀錄片遐邇真；毋過，一寡反應應該是差不多。


性工作者真正是無簡單矣~
除了支持我實在毋知影為啥物欲反對。
但是，這方面佇台灣閣有足長个路愛走...


可能有个儂會共我講:若是恁查某囝去行這途，汝敢會支持?
若是我有共伊參詳過，我絕對是會支持个!


只是，我想彼時陣可能攏是機器儂咧提供這種服務矣~








(本文大部分參考教育部台灣閩南語常用辭典，有个所在用我較佮意个字。
http://twblg.dict.edu.tw/tw/index.htm
儂=lang5
个=e5
矣=ah)

就是欲拍台語文網誌!

Catalunya个官員有說過一句予我足感動个話
"咱若毋講Español，閣過二、三十年伊嘛袂消亡。
但是，咱若毋講Català，閣過二、三十年，伊就會完全消失。"


(華文翻譯:如果我們不講西班牙語，再過二、三十年他也不會消亡。
但是，如果我們不講加泰隆尼亞語，再過二、三十他就會完全消失。)




所以，我想欲盡量用台語文寫文章，希望會使改善台語文个命運。